Sada E Waqt

چیف ایڈیٹر۔۔۔۔ڈاکٹر شرف الدین اعظمی۔۔ ایڈیٹر۔۔۔۔۔۔ مولانا سراج ہاشمی۔

Breaking

متفرق

Sunday, May 5, 2019

بزم تنویر ادب کی 90ویں ماہانہ طرحی نشست منعقد!!

جونپور۔۔۔اتر پردیش۔۔۔صدائے وقت۔
. . . . . . . . . . . . . . . . . . . . . . . . . . . 
شاہ گنج  ۔بزم تنویر ادب کی 90ویں ماہانہ طرحی نشست محمدمصطفی انصاری کے اعزازمیں منعقد ہوئی۔ صدارت ڈاکٹر فیاض احمدعلیگ اورنظامت اخلاق بندوی نے کی۔ ڈاکٹر ساغر جون پوری اور ڈاکٹر آفتاب مجاہدنے بحیثیت مہمانان خصوصی شرکت کی ۔ سرور عالم ایڈووکیٹ نے اپنے خطا ب میں جمہوریت کے تحفظ کے لیے لوگوں سے الیکشن میں بڑھ چڑھ کر حصہ لینے کی اپیل کی۔ نشست کا آغازفہیم جون پوری کے نعتیہ کلام سے ہوا ۔منتخب اشعار قارئین کی نذرہیں۔
. . . . . . . . . . . . . . . . . . . . . 
. . . . . . 
دیکھنا تھا کرب کا باعث مگر دکھا کیے
گھر جلا دینا بانداز ہنر دیکھا کیے
مظہر اعظمی.
ان کے عارض پر خمیدہ زلف کا منظر نہ پوچھ
’ایک ہی مرکز پہ ہم شمس و قمر دیکھا کیے‘
اخلاق بندوی.
جب ہوا ہوں مائل پرواز سوئے آسماں
چاند تارے بس مری گرد سفر دیکھا کیے
فہیم جون پوری.
ہم کو جو نسبت ہے بس اک آپ ہی کے نا م سے
آپ ہی کی شان ہم شام و سحر دیکھا کیے.
اسلم ہاشمی.
منزلیں ٹھوکر پہ اپنی سر بسر دیکھا کیے
یار وہ جو نقش پائے راہبر دیکھا کیے
عارف رئیس.
عزم مستحکم تھا جن کا ان کو منزل مل گئی
جن کو ناکامی کا ڈر تھا رہگزر دیکھا کیے
ساغر جون پوری.
شوخ اتنا ہے وہ ظالم ہر کسی کو بھا گیا
چاند تارے خود زمیں پر رات بھر دیکھا کیے
ظفر اعظمی.
رات دن دیکھا کیے شام و سحر دیکھا کیے
خواب آنے کا ترے آٹھوں پہر دیکھا کیے
ضمیر احمد ضمیر.
عظت عشق و محبت کون سمجھے گا یہاں
آگیا کعبہ وہیں پہ ہم جہاں سجدہ کیے
برق گورکھپوری.
بے کلی جب بڑھ گئی دروازئہ دل کھول کر
گر پڑے سجدے میں پھر اس کا اثر دیکھا کیے
ڈاکٹر آفتاب مجاہد.
گشت کرنا رات کو معمول تھا صدیق کا
کیا گزرتی ہے رعایا پر عمر دیکھا کیے
شاد اعظمی.
جب تلک باقی رہا ہم میں خلوص و اتحاد
نصرت اللہ سے فتح و ظفر دیکھا کیے
سرفراز اعظمی.
ان کے علاوہ ڈاکٹر خالد اعظمی، ڈاکٹر فیاض احمدعلیگ ، یعقوب اعظم ، عادل غالب پوری اور خالد صبرحدی نے بھی اپنا کلا م پیش کیا۔نشست کے اختتا م پر ڈاکٹر خالد اعظمی نے تمام شعراو سامعین کا شکریہ ادا کیا ۔

Post Top Ad

Your Ad Spot