نٸی دہلی /صداٸے وقت /ذراٸع /٢٠ فروری ٢٠٢٠۔
==============================
سپریم کورٹ کے ذریعہ مقرر مصالحت کار سنجے ہیگڑے اور سادھنا رام چندرن دوسرے دن پھر بات چیت کیلئے شاہین باغ پہنچ گئے ہیں ۔ وہ سی اے اے کی مخالفت میں جاری مظاہرہ کے دوسرے دن بھی مظاہرین کے ساتھ بات چیت کیلئے یہاں آئے ہیں ۔ سپریم کورٹ کے مصالحت کار گزشتہ روز بھی شاہین باغ میں مظاہرہ کی جگہ پر پہنچے تھے اور مظاہرین سے بات چیت کی تھی ۔
میڈیا رپورٹس کے مطابق دوسرے دن شاہین باغ پہنچنے کے بعد مصالحت کار سادھنا رام چندرن نے مظاہرین سے کہا کہ آپ نے ہمیں بلایا تھا ، اس لئے ہم آئے ہیں ۔ آپ لوگوں کا جو مدعا ہے وہ سپریم کورٹ پہنچ چکا ہے ۔ آپ کا سوال سپریم کورٹ کے سامنے ہیں ۔ سپریم کورٹ میں سی اے اے پر سماعت ہونی ہے ۔ سپریم کورٹ مانتا ہے کہ آندولن آپ کا حق ہے ۔ شاہین باغ ہے اور شاہین باغ برقرار رہے گا ۔ ہمیں عدالت نے سڑک کو لے کر بات چیت کیلئے بھیجا ہے ۔
وہیں مصالحت کار سنجے ہیگڑے نے کہا کہ مظاہرہ سے کسی کو پریشانی نہیں ہونی چاہئے ، ہم چاہتے ہیں کہ شاہین باغ کا مظاہرہ ملک کیلئے مثال بنے ، جب تک سپریم کورٹ ہے آپ کی بات سنی جائے گی ۔ آپ گزشتہ دو ماہ سے بیٹھے ہوئے ہیں ، ہم ہندوستان میں ایک ساتھ رہتے ہیں تاکہ دوسروں کو پریشانی نہ ہو ۔
