تحریک ندوة العلماء کے مقاصد خمسہ۔

تحریک ندوۃ العلماء کے مقاصد خمسہ
. . . . . . . . . . . . . . .  . . . . . . . . . . .  
کیا ان مقاصد کی تکمیل ہو رہی ہے۔نقطہُ مقاصد کے نیچے مضمون نگار کا تبصرہ بھی دیا جا رہا ہے۔
. . . . . . . . . . . . . . . . . . . . . . . . . . . 
تحریر/ شعیب ندوی (صدائے وقت)۔
. . . . . . . . . . . . . . . . . . . . . . . . . . . 
تاریخ ندوۃ العلماء، جلد اول کے مطابق تحریک ندوۃ العلماء کے پانچ بنیادی مقاصد تھے جو حسب ذیل ہیں:
. . . . . . . . . . . . . . . . . . . . . . . . . . . 
1) ترقی تعلیم: وہ تنزل جو زمانے کے انقلاب اور ہماری بد قسمتی سے علوم اسلامیہ میں ہو گیا ہے، اور روز بروز ہوتا جا رہا ہے وہ کسی طرح روکا جائے، پھر اس میں برگ و بار پیدا کئے جائیں اور جو علوم عرصہ سے ہمارے نصاب میں داخل نہیں ہیں، اور جن کے نہ جاننے سے تعلیم یافتہ گروہ علمائے حال کو بری نظروں سے دیکھتا ہے، اضافہ کئے جائیں تاکہ علماء اس خدمت کو انجام دے سکیں، جو ایک زمانہ میں ہمارے اسلاف نے انجام دی ہے، اسی خیال پر دار العلوم ندوۃ العلماء کی بنیاد ڈالی گئی ہے۔
.  . . . . . . . . . . . . . . . . . . . . . . . . . 
تبصرہ: کیا آج ندوۃ العلماء اپنے اس مقصد اولین کو پورا کرنے کی کوشش کر رہا ہے؟ یا دوسرے تعلیمی اداروں سے بھی ابتر ہو چکا ہے؟
. . . . . . . . . . . . . . . . . . . . . . . . . . . 
2) طریقہ تعلیم کی اصلاح: ہماری ناواقفیت کا صرف نصاب درس ہی ذمہ دار نہیں بلکہ طرز تعلیم ایسا ناقص ہو گیا ہے کہ جس کو قائم رکھ کر کبھی اس بات کی توقع نہیں ہو سکتی کہ طلبہ میں علو حوصلہ، بلندی نظری، مذاق صحیح، زمانے کی ضرورتوں سے واقفیت پیدا ہو، اور ملک و قوم میں وہ ہر طرح کا اعتبار پیدا کر سکیں۔
. . . . . . . . . . . . . . . . . . . . . . . . . . . 
تبصرہ: ذرا اس مقصد کو پڑھیں اور دار العلوم ندوۃ العلماء کے موجودہ فرسودہ طریقہ تعلیم کا جائزہ لیں۔
. . . . . . . . . . . . . . . . . . . . . . . . . . . 
3) رفع نزاع باہمی: اس سے مقصود ان بیہودہ نزاعوں کا روکنا ہے، جس کی وجہ سے مسلمانوں کے مختلف گروہ میں نہایت شرمناک جھگڑے اور فساد برپا رہتے ہیں۔
. . . . . . . . . . . . . . . . . . . . . . . . . . . 
تبصرہ: اس ضمن میں ندوۃ العلماء کیا کر رہا ہے؟
. . . . . . . . . . . . . . . . . . . . . . . . . . . 
4) درستئ اخلاق: آج مسلمانوں کے اخلاق ایسے بگڑے ہوئے ہیں کہ اکثر برائیوں میں نظیر پیش کی جاتی ہے، صاحب اخلاق ہونے کے اب یہ معنی سمجھے جاتے ہیں کہ نمائش اور تصنع سے کام لیا جائے، بد اخلاقی روز بروز بڑھتی جاتی ہے، جھوٹ، غیبت، فریب، خود غرضی، ایذا رسانی اور بد معاملگی کا رواج ہمارے اندر بڑھتا جاتا ہے، لہذا ندوۃ العلماء کا یہ مقصد ہے کہ وہ واعظین کے ذریعہ سے اس خرابی کو بھی دفع کرنے کی کوشش کرے۔
. . . . . . . . . . . . . . . . . . . . . . . . . . . 
تبصرہ: بہت سے ندوی فضلا کے اخلاق اور تبصروں کو پڑھ کر لگتا ہے کہ ندوہ نے اپنے مقاصد سے اس اہم شق کو خارج کر دیا ہے۔
. . . . . . . . . . . . . . . . . . . . . . . . . . . 
5) مسلمانوں کی بہبودی عام: اس مقصد کے ضمن میں بہت سی چیزیں آسکتی ہیں، مثلاً مسلمانوں کو کسب معاش کے جائز اور عمدہ وسائل کی طرف متوجہ کرنا، اور رسوم قبیحہ سے ان کو باز رکھنے کی کوشش کرنا وغیرہ۔
. . . . . . . . . . . . . . . . . . . . . . . . . . .
تبصرہ: ندوۃ العلماء کی سالانہ کارکردگی کا جائزہ ہی بتائے گا کہ وہ اپنے اس مقصد میں کتنا کامیاب ہے۔
. . . . . . . . . . . . . . . . . . . . . . . . . .   
پس نوشت: کیا ندوۃ العلماء کی کارکردگیوں کی کوئی روداد شائع ہوتی ہے جسے پڑھ کر معلوم ہو کہ ندوہ اپنے ان بنیادی مقاصد میں کتنا کامیاب ہے؟ موجودہ سرگرمیوں کا سرسری جائزہ بتاتا ہے کہ ندوہ اپنے ان مذکورہ مقاصد سے کوسوں دور اور دیگر روایتی اداروں کی ڈگر پر چل رہا ہے۔ اس صورت میں ارباب ندوہ اور فضلا کا بے جا احساس تفاخر عقل و خرد سے پرے معلوم ہوتا ہے۔ اگر اسی روایتی ڈگر پر چلنا ٹھہرا تو ندوہ کو باقی رکھنے کا کیا جواز ہے؟ اگر اسے آثار قدیمہ کے طور پر یا مفاد امت کے تحت باقی رکھا جا رہا ہے تو براہ کرم ان مقاصد سے علانیہ دست برداری کا اظہار فرمائیں۔
. . . . . . . . . . . . . . . . . . . . . . . . . . .   ادارہ صدائے وقت کا مضمون نگار کی آرا سے متفق ہونا ضروری نہیں۔