پروفیسر حکیم سعد عثمانی کے سانحہ انتقال پر خصوصی تحریر۔

پرفیسر حکیم سعد عثمانی کو خراج عقیدت۔
. . . . . . . . . . . . . . . . . . . . . . . . . . . 
تحریر / حکیم شمیم ارشاد اعظمی۔
. . . . . . . . . . . . . . . . . . . . . . . . . . . 
آہ پروفیسر حکیم سعد عثمانی صاحب
بڑی خوبیاں تھیں مرنے والے میں. انا للہ و انا الیہ راجعون... اللہ مغفرت فرمائے.
. . . . . . . . . . . . . . . . . . . . . . . . . . . 
پروفیسر سعد عثمانی کا تعلق اطبا آلہ آباد کے اس خانوادہ سے تھا جس نے ملک و ملت کے لیے درخشاں کارنامے انجام دیے ہیں. ایک طرف اسٹیٹ یونانی میڈیکل کالج تو دوسری طرف اس خاندان کی مسیحائی سے بے شمار مریضوں نے شفا پائ.
عثمانی صاحب کے ساتھ اطبا عثمانی کا شاندار مطب اور معالجانہ اسرار و رموز  بھی چلا گیا. سعد عثمانی صاحب کی تقریری اور تحریری دونوں صلاحیتیں غضب کی تھین. اردو اور انگریزی مین بہت خوبصورت انداز میں تقریریں کرتے تھے. پہلی بار طالب علمی کے زمانے میں اجمل خان طبیہ کالج، مسلم یونیورسٹی علی گڑھ کے ایک پروگرام میں سعد صاحب کو سننے کا اتفاق ہوا. مواد اور خود اعتمادی سے بھرا انداز بیان... کسی زاویہ سے نہیں لگتا تھا کہ کوئی حکیم تقریر کر رہا ہے. اس کے بعد کئی پروگرام مین سننے اور ملا قات اور بعد میں ان کی شفقت اکثر و بیشتر فون کال کی شکل میں ظاہر ہو تی. ہمیشہ کال کرنے مین پہل کرتے.
تحریری شکل میں تذکرہ اطبا خاندان عثمانی شایع ہو چکی ہے، اس کے علاوہ امور طبیعیہ پر ایک مسودہ ہے. چونکہ سعد عثمانی صاحب کلیات طب کے استاد تھے، اس لیے اس کتاب کی اہمیت اور بھی بڑھ جاتی ہے. یہ کتاب سعد صاحب کی زندگی بھر کے تدریسی تجربات کا نچوڑ ہے. ان کے فرزند سے گزارش ہے کہ اس کتاب کو شائع کرکے اپنے والد محترم اور خاندان عثمانی کی آخری نشانی کو ہمیشہ کے لیے محفوظ کر لیں.  اس کے علاوہ مضامین کی بھی اچھی خاصی تعداد ہے. راقم حکیم محمد مختار اصلاحی صاحب کی حیات و خدمات سے متعلق جو کتاب مرتب کیا ہے، اس میں بھی سعد صاحب کا مضمون شامل ہے، افسوس کی یہ کتاب ان کی زندگی میں شایع نہ ہوسکی. سعد صاحب نے اس مضمون میں اپنے خاندان اور حکیم محمد مختار اصلاحی صاحب کے تعلقات کو نمایاں طور سے ظاہر کیا ہے.  انشاءاللہ یہ کتاب عنقریب شایع ہوگی. سعد صاحب کی گفتگو اور باتوں سے بڑا حوصلہ ملتا تھا. مدمقابل کا ذکر اور اس کی کج ادائیوں کا تذکرہ ضرور کرتے مگر کبھی آپے سے باہر نہیں ہوتے، اکثر کہتے میاں طب یونانی نکموں سے بھری پڑی ہے اور عجب کہ زمام اقتدار بھی انہی کے ہاتھ میں ہے. بیشمار لوگوں کے راز پنہاں اس ذات کے ساتھ دفن ہوگئے.
آسماں تیری لحد پر شبنم افشانی کرے۔
. . . . . . . . . . . . . . . . . . . . . . . . . . . 
صدائے وقت۔