*بانگِ کہن، سلسلہ 71*
✏ فضیل احمد ناصری /صداٸے وقت۔
==============================
سر نہ ہو پائے گا تم سے کوہسارِ زندگی
اس طرح گزرے اگر لیل و نہارِ زندگی
دیکھ لے کتنا دگر گوں ہو چکا ہے آسماں
دیکھ کتنا تنگ ہے تیرا حصارِ زندگی
جتنی جلدی ہو سکے اے مردِ مومن جاگ جا
ورنہ پڑ جائے گا خطرے میں قرارِ زندگی
اٹھ کھڑا ہو جلد طاغوتی عزائم کے خلاف
یوں نہ ہو پھر کفر بن جائے شعارِ زندگی
اب بھی گر بیدار ہو پایا نہ احساسِ زیاں
اٹھ نہیں پائے گا پھر امت سے بارِ زندگی
متحد ہو جا کہ ہے تیری یہی راہِ نجات
پیش خیمہ موت کا ہے انتشارِ زندگی
عیش و عشرت کےلیے تیری تگ و دو کب تلک
ایک دن لٹ جائے گی ساری بہارِ زندگی
خوفِ دشمن سے نکل! اعصاب کو آزاد کر
چاہتا ہے تو اگر اے دل ! وقارِ زندگی
جانے کب منزل چلی آئے ترے زیرِ قدم
بے تحاشا تیز رو ہے راہوارِ زندگی
