بے نقاب تو وہ ہو گیا۔۔۔۔۔۔۔۔۔۔۔ایک افسانچہ۔

         صداٸے وقت۔

====================

غریب عورت راشن کا ڈبہ لے کر گھر پہنچی

نقاب اتارا ۔

اور کھانا پکانے کی تیاری کرنے لگی ۔

بچے خاموشی سے دیکھ رہے تھے ۔

بیٹی نے پوچھا :

" ماں ۔۔۔۔ یہ راشن کہاں سے ملا ۔۔۔۔۔؟"

" ایک بڑے آدمی نے دیا ہے ۔۔۔۔؟"

" بڑا آدمی ۔۔۔۔؟" بیٹی نے چونک کر پوچھا ۔

" ہاں ۔۔۔۔ بہت بڑا آدمی ۔۔۔۔ فوج ، سپاہی ،ادارے ، سب اس کے ماتحت ہیں ۔۔۔۔"

بیٹی حیرانی سے بولی ۔

" اتنے بڑے آدمی نے اتنا چھوٹا سا پیکٹ دیا ۔۔۔۔؟"

ماں نے اثبات میں سر ہلایا ۔

" ہاں ۔۔۔۔ بیٹا ۔۔۔۔۔ صرف عہدہ بڑا تھا اس کا ۔۔۔۔ "

بیٹی چپ ہوگئی ۔ سوچتی رہی ۔ پھر بولی ۔

" کسی کو پتا تو نہیں چلا اماں ۔۔۔ کہ تم یہ خیرات کا راشن لائی ہو ۔۔۔۔؟ "

ماں نے انکار میں سر ہلایا ۔

" نہیں ۔۔۔۔۔ میں نے نقاب لگایا ہوا تھا ۔۔۔۔۔ تصویر کھنچی تو میرے نقاب نے میرا چہرہ چھپالیا ۔۔۔۔"

بیٹی تڑپ گئی ۔

" اماں ۔۔۔۔۔ تمہیں شرم نہیں آئی ۔۔۔۔ خیرات لیتے وقت تصویر کھنچواتے ہوئے ۔۔۔۔۔"

ماں نے پھیکی سی مسکراہٹ سے کہا ۔

" نہیں بیٹا ۔۔۔۔۔۔ اُسے بھی نہیں آئی ۔۔۔۔ میں تو نقاب میں تھی ۔۔۔۔

بے نقاب تو وہ ہو گیا ۔۔

#ماخوذ#