نٸی دہلی /صداٸے وقت /ذراٸع / ١٥ مٸی ٢٠٢٠۔
=============================
ملک میں کورونا وائرس کے معاملات جمعہ کو بڑھ کر 81970 ہوگئے ہیں ۔ ساتھ ہی 2649 لوگ کووڈ 19 سے اپنی جانیں گنوا چکے ہیں ۔ اس کے پھیلاو کو روکنے کیلئے 17 مئی تک لاک ڈاون لگایا گیا ہے ۔ ایسا امکان ظاہر کیا جارہا ہے کہ مرکزی حکومت کی جانب سے 18 مئی سے لاک ڈاون کا چوتھا مرحلہ بھی کچھ ڈھیل کے ساتھ لاگو کیا جاسکتا ہے ۔ وزیر اعظم مودی بھی اس جانب اشارہ کرچکے ہی ۔ ایسے میں 11 ریاستیں 18 مئی سے اس لاک ڈاون کو لے کر خاص منصوبہ تیار کررہی ہیں ، جس میں تجارتی سرگرمیوں میں کچھ چھوٹ دی جاسکتی ہے ۔
ہریانہ
کچھ تبدیلیوں کے ساتھ لاک ڈاون جاری رہ سکتا ہے ۔ ریاست کی سرحدوں پر شرائط میں چھوٹ کے ساتھ لاک ڈاون جاری رہ سکتا ہے ۔ ریاست کے دس اضلاع میں سرکاری ٹرانسپورٹ چلانے کا منصوبہ ہے ۔ ریاستی حکومت 18 مئی سے صرف دہلی ریلوے اسٹیشن کیلئے بس سروس شروع کرنے پر غور کررہی ہے ۔ صنعتی اور تجارتی سرگرمیاں 18 مئی سے بڑھ سکتی ہیں ۔
پنجاب
وزیر اعلی دفتر کے ذرائع کے مطابق ریاست میں لاک ڈاون جاری رہ سکتا ہے ۔ حالانکہ اس دوران بندشوں میں کچھ ڈھیل دی جاسکتی ہے ۔ ذرائع کے مطابق ریاستی حکومت ریاست میں ریڈ زون میں بھی شرائط و ضوابط کے ساتھ کچھ اسمال ، میڈیم اور مائیکرو صنعت کھولنے پر غور کررہی ہے ۔
ہماچل پردیش
وزیر اعلی دفتر کے ذرائع کے مطابق ریاست میں تجارتی سرگرمیاں بڑھ کر لاک ڈاون کو جاری رکھنے پر غور و خوض کیا جارہا ہے ۔ ریاست کی سرحد بند رہے گی ۔ صنعتی اور تجارتی سرگرمیوں کو دھیرے دھیرے چالو کیا جائے گا ۔ اقتصادی سرگرمیوں کو بڑھانے کیلئے ریاستی حکومت زیادہ اجازت دینے پر غور کررہی ہے ۔ ریاست کے اندر آمد و رفت شروع کئے جانے پر بھی غور کیا جارہا ہے ۔
اوڈیشہ
ذرائع نے بتایا کہ اوڈیشہ میں کووڈ 19 کے کنٹینمٹ زون میں ہی سختی ہوگی ۔ دیگر زون میں لاک ڈاون میں ڈھیل دی جائے گی ، اس کیلئے سماجی دوری پر عمل کرنا ہوگا ۔
اترپردیش
اترپردیش میں ریڈ زون میں پابندیاں جاری رہ سکتی ہیں ۔ ریڈ زون کے سیل ہاٹ اسپاٹ کے باہر ایک تہائی دکانیں کھولنے کی اجازت دی جاسکتی ہے ۔ نجی آفس کو پچاس فیصد اسٹاف کے ساتھ کام کرنے کی اجازت پہلے ہی دی جاچکی ہے ۔ شرطوں کے ساتھ مینوفیکچرنگ اور زراعتی کام بھی جاری ہے ۔ اورینج اور گرین زون میں کچھ پابندیوں کے ساتھ معمولات زندگی شروع ہوسکتی ہے ۔ مال ، جم ، ریستوراں ، اسکول وغیرہ نہیں کھولے جائیں گے ۔
بہار
ذرائع کے مطابق بہار میں کچھ سیکٹر میں تجارتی سرگرمیوں کی چھوٹ کے ساتھ لاک ڈاون جاری رہ سکتا ہے ۔
گجرات
ذرائع کے مطابق گجرات میں بھی کچھ ڈھیل کے ساتھ لاک ڈاون جاری رہے گا ۔ ریاستوں میں کنٹینمنٹ زون کو چھوڑ کر ریڈ زون میں بھی کچھ گھنٹوں کیلئے 30 فیصدی اسٹاف کے ساتھ آفس کھولنے کی اجازت دی جاسکتی ہے ۔
مدھیہ پردیش
وزیر اعلی دفتر کے ذرائع کے مطابق سرکار گرین زون میں اقتصادی سرگرمیاں شروع کرنے کی اجازت دے سکتی ہے ۔ ریاست کے گرین زون میں جفت و طاق فارمولہ کے مطابق دکان کھولی جاسکتی ہیں ۔ ریڈ زون میں بھی کچھ اقتصادی سرگرمیوں میں چھوٹ کا امکان ہے ۔
راجستھان
کووڈ 19 سے متاثرعلاقوں کو چھوڑ کر ریاستی حکومت لاک ڈٓون بڑھانے کے حق میں نہیں ہے ۔ سرکار چاہتی ہے کہ گرین زون میں تجارتی سرگرمیاں شروع کی جائیں ۔ وزیر اعلی گہلوت وزیر اعظم سے اپیل کرچکے ہیں کہ زون مقرر کرنے کا کام ریاستوں کو دیا جائے تاکہ اقتصادی سرگرمیاں شروع جا سکیں ۔
آسام
ریاستی حکومت کے ذرائع کے مطابق سرکار لاک ڈاون کو دو ہفتے تک بڑھانا چاہتی ہے ۔ صرف کنٹینمنٹ زون میں ہی سخت قانون لاگو رہ سکتے ہیں ۔ دیگر شعبوں میں سماجی فاصلہ کے ساتھ کچھ ڈھیل ممکن ہے ۔
مہاراشٹر
مہاراشٹر حکومت جمعرات کو خواہش ظاہر کرچکی ہے کہ لاک ڈاون کو ممبئی مہانگرعلاقہ ، سولاپور ، پونے ، اورنگ آباد اور مالیگاوں میں 31 مئی تک بڑھایا جائے ۔ یہ سبھی ہاٹ اسپاٹ ہیں ۔
