ایک ‏خوبصورت ‏نظم ‏بعنوان ‏”عید ‏“۔

از/اختر سلطان اصلاحی/صداٸے وقت۔

                     . عید.   =========================

رنج وغم جتنے ہیں سب یکسر بھلا دیتی ہے عید

روٹھنے والوں کو بھی آکر منا دیتی ہے عید

اس سے بڑھ کر اور کیا خوش ہو گیا رب کریم

کامیابی کا عجب مزدہ سنا دیتی ہے عید

ہر بشر مسرور ہے ہر سو مبارکباد ہے

کینہ و بغض و حسد دل سے مٹا دیتی ہے عید

جو غموں سے چور ہیں وہ بھی بہت مسرور ہیں

زندگی میں اک نیا جذبہ جگا دیتی ہے عید

پیرہن بچوں کا اور نوخیز کلیوں کا سنگھار

ہر گلی، کوچہ، محلہ، جگمگا دیتی ہے عید

روٹھنا بیگم کا، اور بچوں کا عیدی مانگنا

کام سب لطف ومحبت سے بنا دیتی ہے عید

یاد آتا ہے جو گھر پردیس میں پردیسی کو

بس مچل جاتا ہے دل، اس کو رلا دیتی ہے عید

ہم گلے کس سے ملیں کس کو مبارکباد دیں

دشت غربت میں میاں جی کو جلا دیتی ہے عید

جمع ہوں احباب، رشتے دار اہل خانہ جب

کیا کہوں اختر کہ پھر کیسا مزہ دیتی ہے عید

اختر سلطان اصلاحی