یوپی حکومت نے 8 جون کو لیکر ایک مرتبہ پھر نئی گائیڈ لائنس جاری کردی ہیں۔ اب مندروں، شاپنگ مالز اور دیگر عوامی اور مذہبی مقامات کو کھولنے سے پہلے ضلع انتظامیہ کی اجازت لینی ضروری ہوگی۔
لکھنٶ۔۔اتر پردیش /صداٸے وقت /ذراٸع /6 جون 2020.
==============================
یوپی حکومت نے 8 جون کو لیکر ایک مرتبہ پھر نئی گائیڈ لائنس جاری کردی ہیں۔ اب مندروں، شاپنگ مالز اور دیگر عوامی اور مذہبی مقامات کو کھولنے سے پہلے ضلع انتظامیہ کی اجازت لینی ضروری ہوگی۔ ساتھ ہی مندروں میں ایک بار میں پانچ سے زیادہ لوگ داخل نہیں ہوسکیں گے۔ اسی کے ساتھ دفتروں اور دیگر عوامی مقامات کو لیکر بھی کئی اہم تبدیلیاں کی گئی ہیں۔ غور طلب ہے کہ اس سے پہلے ریاستی حکومت نے 31 مئی کو گائڈ لائنس جاری کی تھیں جس میں 8 جون سے مندروں اور شاپنگ مالز کو کھولنے کی بات تھی۔
اترپردیش کے چیف سکریٹری راجیندر کمار تیواری کے جاری کردہ حکم میں کہا گیا ہے کہ مذہبی مقامات کو کھولنے سے متعلق انتظامیہ اور پولیس کی طرف سے آرڈر ملنے کے بعد بھی کچھ اصولوں پر عمل کرناضروری ہوگا۔ ان اصولوں کے تحت کسی بھی مذہبی یا عبادت گاہ میں ایک ہی جگہ پر 5 سے زیادہ عقیدت مندوں کے جمع ہونے پر پابندی ہوگی۔ اس کے علاوہ داخل ہونے پر ہاتھوں کو جراثیم کش کرنے کے لئے الکوہل پر مشتمل ایک سینیٹائزر کا استعمال کیا جانا چاہئے۔ نیز مذہبی مقام پر آنے والے زائرین کے درجہ حرارت کی پیمائش کے لئے ایک انفراریڈ تھرمامیٹر کا بندوبست کرنا ہوگا۔
ایڈیشنل چیف سکریٹری (ہوم اینڈ انفارمیشن) اونیش کمار اوستھی نے کہا کہ مذہبی مقامات ، دفاتر ، مالز ، ہوٹلوں اور ریستوراں کے لئے جاری کردہ گائیڈ لائنس میں ایک چیز لازمی ہے کہ ہر ایک کے لئے چہرہ ڈھانپنا اور ماسک پہننا لازمی ہوگا۔ ان لاک 1.0 کے تحت دی گئی نرمی کے دوران کوئی بھی شخص بغیر ماسک کے رہے گا۔ اوستھی نے بتایا کہ وزیر اعلی نے کہا کہ ہر شخص عوامی مقام پر چھ فٹ کی دوری رہے گا۔ ہر عمارت میں داخل ہونے سے پہلے الکوہل سے صاف کرنا لازمی ہوگا ۔ سینیٹائزر ہر عمارت ، عبادت گاہ اور دیگر مقامات پر مہیا کی جائے گی۔
