Sada E Waqt

چیف ایڈیٹر۔۔۔۔ڈاکٹر شرف الدین اعظمی۔۔ ایڈیٹر۔۔۔۔۔۔ مولانا سراج ہاشمی۔

Breaking

متفرق

Friday, December 18, 2020

زندگی ‏قیامت ‏ہے ‏۔۔۔۔اخلاق ‏بندوی ‏کی ‏ایک ‏خوبصورت ‏غزل ‏

غزل /  اخلاق بندوی / صداٸے وقت .
========-=====================
آشنا بھی لگتے ہیں اجنبی قیامت ہے 
مفلسی کے سائے میں زندگی قیامت ہے  

 پڑ نہ جائے خطرے میں آبرو خدائی کی 
آج کل کے بندوں کی بندگی قیامت ہے

پوچھ مت گزرتی ہیں کیسے ہجر کی راتیں 
اک صدی سی لگتی ہے اک گھڑی قیامت ہے 

عشق کی زمانے میں کس قدر ہے نا قدری
مجھ  پہ جاں چھڑکتے ہیں آپ بھی قیامت ہے

ہر قدم پہ ناکامی ہر قدم پہ محرومی 
مصلحت کے بندوں کی رہبری قیامت ہے

صورتیں فرشتوں سی کام اہرمن جیسے 
روشنی کے دامن میں تیرگی قیامت ہے 

حالِ دل سنانے میں ہوگئیں لہو آنکھیں
اور تم کو سوجھی ہے دل لگی قیامت ہے

گر یقیں نہیں آتا شاہِ وقت سے پوچھو
راہبر بھی کرتے ہیں رہزنی قیامت ہے
 
_________ اخلاق بندوی ________

Post Top Ad

Your Ad Spot