از/ فضیل احمد ناصری /صداٸے وقت
=======================
بانگ کہن
۔۔۔۔۔۔۔۔۔۔۔۔۔۔۔۔۔۔
کھل گیا راز ، عیاں سینۂ افلاک ہوا
جاگ مسلم! کہ اندھیروں کا جگر چاک ہوا
دیکھ ! بو جہل ثریا پہ ہوا اوج نشیں
دیکھ! دشمن ترا کس ڈھنگ سے چالاک ہوا
آزرِ ہند ہوا شعلہ فشاں ، خندہ بہ لب
کارواں آلِ براہیمؑ کا نم ناک ہوا
جن میں چستی تھی،ہوئے زندۂ جاوید وہی
جو ہوا سست وہی ہم نَفَسِ خاک ہوا
جب سے چھوڑا ہے روایاتِ سلف کو ہم نے
عالمِ کفر اسی روز سے بے باک ہوا
کھوکھلی ہو گئی ، گرنے لگی دیوارِ حرم
تم کو اب بھی نہ مگر کوئی بھی ادراک ہوا
تم نے شیرازۂ ملت کی کوئی فکر نہ کی
لازماً سارا جہاں قاتل و سفاک ہوا
جن پہ آسان تھا دریا کا سفر ، ڈوب گئے
جس کو معلوم نہ تھا فن، وہی تیراک ہوا
بحر و بر آج بھی ہو سکتے ہیں خادم تیرے
تو اگر وارثِ حق ، صاحبِ لولاک ہوا
