از/فضیل احمد ناصری /صداٸے وقت۔
==============================
ہر یاد تری سینۂ بسمل میں رہے گی
اے بابری مسجد ! تو مرے دل میں رہے گی
آہوں سے بھرا ساز ہوں، میں غم سے ہوں بے کل
تن زخم سے معمور ہے ، دل درد سے بوجھل
ہر سمت ہے پھیلی ہوئی آفات کی دلدل
معلوم یہ ہوتا ہے کہ میں ہوں سرِ مقتل
تا موت یہ تصویر مرے دل میں رہے گی
اے بابری مسجد تو مرے دل میں رہے گی
لگتی ہے پہاڑوں سی مجھے تیری جدائی
اے کاش کہ سنتی مری آشفتہ نوائی
دیتا ہے زمانہ تجھے رو رو کے دہائی
آ جاؤ کہ ناراض ہے امت سے خدائی
تا عمر یہ نالش مری محفل میں رہے گی
اے بابری مسجد تو مرے دل میں رہے گی
یہ دیکھ لے آفاق کے پُر ہول نظارے
روتے ہیں ترے واسطے گردوں کے ستارے
بے چین ہے خورشیدِ جہاں درد کے مارے
ہر صاحبِ ایماں ترے ماضی کو پکارے
ہر راہ میں ، ہر موڑ پہ ، منزل میں رہے گی
اے بابری مسجد تو مرے دل میں رہے گی
تو کتنی جواں، شوخ نظر ، کتنی حسیں تھی
ہاں تو ہی روایاتِ مسلماں کی امیں تھی
مٹی میں تری صاحبِ ایماں کی جبیں تھی
تاریخ کی ضامن تری یہ پاک زمیں تھی
تو زندہ ہر اک مومنِ کامل میں رہے گی
اے بابری مسجد تو مرے دل میں رہے گی
ہیں یاد ہمیں تیری اذانوں کی نوائیں
تازہ ہیں ابھی تک ترے خطبوں کی صدائیں
توحید سے معمور رہیں تیری فضائیں
چلتی تھیں ترے صحن میں جنت کی ہوائیں
تو موج میں، طوفان میں ، ساحل میں رہے گی
اے بابری مسجد تو مرے دل میں رہے گی
لا ریب رہی عدل کی میزان بھی تو ہی
تھی ہند کے آئیں کی نگہبان بھی تو ہی
تھی ناقۂ ملت کی حدی خوان بھی تو ہی
اور ماضئ مرحوم کی پہچان بھی تو ہی
غنچوں میں ، گلابوں میں ، عنادل میں رہے گی
اے بابری مسجد تو مرے دل میں رہے گی
اے جانِ شہیداں ! تو ہمیشہ ہی رہی طاق
رکھیں گے تجھے یاد سدا انفس و آفاق
پائندہ رکھیں گے تجھے تاریخ کے اوراق
لکھے گا مؤرخ تجھے ہر دور میں چقماق
آئینہ صفت سب کے مقابل میں رہے گی
اے بابری مسجد تو مرے دل میں رہے
گی
