فضیل احمد ناصری /صداٸے وقت۔
======================
تو ہی جرات سے اگر نا آشنا ہوجائے گا
ظالموں کا زور پھر بے انتہا ہو جائے گا
تو نےگر ڈھونڈا نہیں کافر مزاجی کا علاج
درد تیرا رفتہ رفتہ لا دوا ہو جائے گا
جنبشِ لب سیکھ اور اپنی فضا کر سازگار
ورنہ تیرا سازِ ہستی بے صدا ہو جائے گا
پتھروں کےساتھ گر تیرا رہا یوں ہی سلوک
ذرہ ذرہ خاک کا اک دن خدا ہو جائےگا
یہ زمیں محشرکامنظر پیش کرنےہی کو ہے
ہر مسلماں بھائی بھائی سےجدا ہو جائے گا
مسجدیں ترسیں گی پھر تیری جبینوں کےلیے
اے مسلماں! تو اگر بے دست و پا ہو جائے گا
درد میں ڈوبے ہوئے اے عندلیبو کچھ کرو
ورنہ یہ گلشن تمہارا مقبرہ ہو جائے گا
چند نعرے، چند تقریریں، ذرا سے تبصرے
کیا محض اتنے سے ہر ذمہ ادا ہو جائے گا؟
لا سلف سے مانگ کر اے ناصری! روحِ کلیم
تیری ضربوں سے سمندر راستہ ہو جائے گا
