نٸی دہلی /صداٸے وقت /ذراٸع / ١٠ دسمبر ٢٠٢٠۔
=============================
مغربی بنگال میں اگلے سال ہونے والے اسمبلی انتخابات سے پہلے بی جے پی اور ترنمول کانگریس کے کارکنان میں تکرار بڑھتی جارہی ہے ۔ بی جے پی کے قومی صدر جے پی نڈا جمعرات کو جب ڈائمنڈ ہاربر جارہے تھے تبھی ٹی ایم سی کے کچھ کارکنان نے ان کے قافلہ پر حملہ کردیا ۔
جس وقت جے پی نڈا کے قافلہ پر حملہ کیا گیا ، اس وقت نڈا کے ساتھ بی جے پی کے سینئر لیڈر کیلاش وجئے ورگی بھی موجود تھے ۔ ذرائع سے ملی خبر کے مطابق وزارت داخلہ نے ریاستی حکوتم سے اس حملہ کے سلسلہ میں رپورٹ طلب کی ہے ۔
بی جے پی لیڈروں کے مطابق پارٹی کے جنرل سکریٹری کیلاش وجئے ورگی سمیت متعدد لیڈران زخمی ہوگئے ہیں ۔ بی جے پی لیڈروں نے دعویٰ کیا کہ ان کی گاڑی کو سخت نقصان پہنچا ہے ۔
حملہ کے بعد پارٹی کارکنان سے خطاب کرتے ہوئے جے پی نڈا نے کہا کہ آج میں نے جو کچھ دیکھا وہ حیران کن اور بے مثال ہے ۔ مغربی بنگال میں مکمل طور پرلاقانونیت اور عدم رواداری کا ماحول ہے ۔ بنگال میں قانون نام کی کوئی چیز نہیں ہے ۔ غنڈہ راج کا ہرطرف بول بالا ہے ۔
جے پی نڈا نے کہا کہ چوں کہ وہ پلٹ پروف کار میں سفر کررہے تھے اس لئے انہیں کوئی نقصان نہیں پہنچا ہے ، مگر ان کے ساتھ قافلے میں موجود دیگر لیڈران سفر کررہے تھے ۔
جے پی نڈا نے کہا کہ ماں درگا کی مہربانی سے میں پچ گیا ہوں ۔ مجھے اندازہ ہے کہ ایسے ماحول میں بی جے پی لیڈران اور ورکروں کو کتنی مشکلات کا سامنا ہے۔
نڈا نے کہا کہ ترنمول کانگریس کے دن گنے جاچکے ہیں ۔ ترنمول کانگریس کی بدعنوانی نیچے سطح تک پہنچ گئی ہے ۔ عوام نے فیصلہ کرلیا ہے کہ ترنمول کانگریس کو اقتدار سے بے دخل کردیا گیا ہے ۔
